De Begrëff Ingenieur kënnt aus dem Mëttelalter a staamt vum laténgesche Wuert “ingenium” of, wat esou vill wéi “produktive Geescht” bedeit. Den Ingenieur haut ass en Erfinder an e Problemléiser. A sengem Beruff muss den Ingenieur Léisungen zu Problemer technescher Natur fannen, déi him gestallt ginn. Dobäi muss den Ingenieur oft “ëm den Eck” denken a kreativ sinn. Fir d‘Problemer ze léisen, benotzt den Ingenieur Mathematik a physikalesch Gesetzer. Hautdesdaags kann den Ingenieur ganz oft schonn op Technologien a Methoden zréckgräifen, déi aner Ingenieure virun him schonn entdeckt oder entwéckelt hunn. Deemno muss den Ingenieur haut oft déi al Technologien a Methode verbesseren oder se dem Problem, dee sech him grad stellt, upassen. Et ass wichteg, dass den Ingenieur zum Asaz kënnt, ier e Produit oder e Projet agesat oder fäerdeggestallt gëtt, well hie kapabel ass, de Realfall scho virun dem Abetribhuelen, bzw. Bau, ze berechnen oder duerzestellen. Sou gëtt verhënnert, dass de Projet oder de Produit een Desaster gëtt.

Fir kënnen Ingenieur ze ginn, muss ee studéieren. Nom Studium ass een dann e Bachelor/Master of Science, wann een op enger Universitéit oder enger technescher Héichschoul säin Ofschloss gemaach huet, oder e Bachelor/Master of Engineering wann een den Ofschloss op enger Fachhéichschoul gemaach huet. (Fréier huet den nämmlechten Ofschloss Diplom Ingenieur geheescht).

Den Ingenieur muss virun allem ee Wëssen an der Mathematik an an der Physik hunn, dofir gëtt am Studium ee grousse Wäert dorop geluecht. Dëst ass fir all Ingenieur dat wichtegst a gëtt dofir och an all Studiegang geléiert. Bal genau sou wichteg ass et duerno Methoden, Theorien an aner fachspezifesch Kompetenze bäibruecht ze kréien. Dës Kompetenze si vum Ingenieursberäich ofhängeg, mä als gemeinsam Basis hu se all ee wëssenschaftlechen Hannergrond. Si sinn dofir do, dass den Ingenieur seng Aarbecht duerno méi effizient ka maachen, well hie weess, wéi e sech am beschten uleet, fir déi gestallten Aufgab ze léisen.

Et gëtt vill verschidden Ingenieuren. Dëst sinn awer oft nëmmen extra Nimm fir net ganz sou extra Kompetenzen. Déi meescht Ingenieuren hunn eng vun den 3 grousse Richtunge Maschinnebau, Bauingenieur an Elektroingenieur studéiert a sech da wärend hirem Studium an déi Richtung spezialiséiert.

Ingenieuren, an och déi, déi et net onbedéngt am Numm stoen hunn, si relativ villfälteg asetzbar. Et ginn zum Beispill ëmmer méi Ingenieuren op Banken, Assurancen, a Consultingfirmen oder och beim Staat oder de Gemenge gesicht. Doduerch, dass eis Welt ëmmer méi komplex Technik benotzt an en demographesche Wandel stattfënnt, gesinn d’Beruffschancë fir d’Zukunft positiv aus. Eng aner interessant Saach ass, dass ee grad a grousse Betriber als Ingenieur och aner Beräicher, wéi zum Beispill Marketing oder Controlling, zougetraut kritt, woubäi dëst ëmgedréint fir den Ekonomist net sou einfach ass.

Nieft der Auswiel vun der Stad (jee no Land staark ofwäichend Studienorganisatiounen) an dem Fach (am beschte mat klenge Stagë virum Studium ofsécheren) sollt ee sech och mat der Fro beschäftegen, ob een op eng Universitéit oder eng Fachhéichschoul well studéiere goen. Dës Begrëffer si leider net ëmmer kloer definéiert, sou dass ee grad a franséischsproochege Länner méi genau muss kucken, wat elo wat ass (d’Uni Lëtzebuerg ënnerscheet hei z.B. tëschent académique a professionel). Bei der Bezeechnung vum Ofschloss kann een oft och en Ënnerscheed feststellen, deemno ob et Bachelor/Master of Science (meeschtens Uni) oder –Engineering (meeschtens FH) ass.
Et besteet en Niveaus- an deelweis och e Viraussetzungsënnerscheed tëschent Uni an Héichschoul, souwuel bei der Vitesse vun de Coursen, dem Opbau vum Cours, den Übungen, dem Selbststudium an och an den Examen. Dobäi ass de behandelte Stoff meeschtens änlech; et gëtt dem Student just op eng aner Aart a Weis bäibruecht. Op enger Uni huet ee prinzipiell manner Coursen a méi Selbststudium (et muss ee sech also Villes selwer bäibréngen). Ausserdeem ass et op der Uni keng Seelenheet zu e puer Honnert an engem Cours ze sëtzen, woubäi dëst op den Héichschoule meeschtens méi kleng Gruppe sinn a soumat d’Betreiung och méi intensiv ass. Weiderhin ass eng Uni éischter op d’Grondlagefuerschung an domat méi theoretesch an zukünfteg ausgeriicht. D’Proffen hu meeschtens e Lehrstuhl mat Mataarbechter fir ze fuerschen. Op den Héichschoulen ass d’Léier éischter méi praxis-, respektiv uwendungsorientéiert an aktuell, sou dass hei d’Proffen oft an der Privatwirtschaft schaffen a fir d’Coursen an d’Héichschoul kommen. Et kann ee mat Aschränkungen och wärend dem Studium wiesselen, woubäi et erop ëmmer méi schwiereg ass wéi erof. Absolvente vu béide Richtungen, also Uni oder FH, ginn ëmmer gebraucht, mä d’Aschaffszäit ass no der Héichschoul, wéinst der Praxisorientéierung, awer an der Reegel méi kuerz. Vill Entreprisë maachen e Karriärsënnerscheed tëschent deenen zwou Richtungen, awer oft gëtt och kee gemaach an et hänkt ebe vun den individuelle Fäegkeeten of, wéi ee sech entwéckelt (dës sollt een och am Studium net vernoléissegen, z.B. Softskills). Wieder sollt ee sech genau mat de Prüfungsuerdnunge bekannt maachen, well dës kënnen tëschent de Fächer, de Schoulen a virun allem tëschent de Länner staark variéieren a séier zu enger Exmatrikulatioun féieren.

Méiglech sinn am Normalfall Bachelor, Master an Dokter. Op enger Uni ass de „Reegelofschloss“ ee Master. Wann een dann nach net genuch huet, kann ee sech och en Dokter iwwerleeën, dëst ass meeschtens och op enger FH méiglech. An de Grondlagefächer wéi Mathe, Physik a Chimie gëtt méi oft promovéiert, well dat an der Fuerschung meeschtens gefrot ass. Heibäi sollt een allerdéngs vill Bëss a Motivatioun hunn.

Oft gestallte Froen

Kontaktéier eis